చాలా మంది కాకరకాయ చేదుగా ఉంటుందని తినడానికి అస్సలు ఇష్టపడరు. కానీ పచ్చి మామిడి కాయ పులుపును, వివిధ రకాల నాటు మసాలాలను కాకరకాయలో స్టఫ్ చేసి వండితే ఆ రుచే వేరుగా ఉంటుందని చెఫ్ కునాల్ కపూర్ చెబుతున్నారు. కాకరకాయను ఇష్టపడని వారి మనసును సైతం మార్చేసే ఈ అద్భుతమైన దేశీ వంటకం తయారీ విధానం తెలుసుకుందాం..
పచ్చి మామిడితో పుల్లపుల్లగా..
కాకరకాయ అనగానే మనకు గుర్తొచ్చేది చేదు. కానీ ఆ చేదును పచ్చి మామిడి కాయలో ఉండే పులుపుతో సమతుల్యం చేస్తే అది ఒక అద్భుతమైన ఇంటి భోజనంగా మారుతుందని చెఫ్ కునాల్ కపూర్ పేర్కొన్నారు. ఈ కూర వండిన రోజు కంటే మరుసటి రోజు మెత్తటి రోటీలతో తింటే ఇంకా అద్భుతమైన రుచిని ఇస్తుందని తెలిపారు. ఈ వంటకం చేయడానికి పెద్ద సైజు కాకరకాయలు ఆరు, ఒక టేబుల్ స్పూన్ ఉప్పు అవసరం. అలాగే స్టఫింగ్ కోసం చిన్న పచ్చి మామిడి కాయలు రెండు, అర కప్పు ఉల్లిపాయ ముక్కలు, పచ్చిమిర్చి, సోంపు, పసుపు, కారం, అల్లం తరుగు, ధనియాల పొడి, జీలకర్ర పొడి, గరం మసాలా, కసూరీ మేథీ, ఇంగువ, నల్ల ఉప్పు మరియు ఆవాల నూనె అవసరమవుతాయి.
తయారీ విధానం
మొదట కాకరకాయల పైన ఉండే గరుకు చర్మాన్ని పీలర్తో తీసి పక్కన పెట్టుకోవాలి. ఆ తర్వాత కాకరకాయల మధ్యలో నిలువుగా గాటు పెట్టి లోపల ఉండే గింజలను స్పూన్ సహాయంతో బయటకు తీయాలి. ఇప్పుడు ఈ గింజలను, పక్కన పెట్టిన కాకరకాయ తొక్కలను కలిపి చిన్న ముక్కలుగా కట్ చేసుకోవాలి. తర్వాత కాకరకాయలపై ఉప్పు రాసి కాసేపు పక్కన పెడితే వాటి నుండి నీరు వస్తుంది. ఆ తర్వాత వాటిని శుభ్రంగా కడిగి ఆరబెట్టాలి. ఇప్పుడు స్టఫింగ్ కోసం సన్నగా తరిగిన పచ్చి మామిడి కాయ ముక్కలు, ఉల్లిపాయలు, పచ్చిమిర్చి, సోంపు, అల్లం తరుగు, ధనియాల పొడి, జీలకర్ర పొడి, గరం మసాలా, కసూరీ మేథీ, ఇంగువ, ఉప్పు, ఆవాల నూనెను ముందుగా సిద్ధం చేసుకున్న కాకరకాయ తొక్కలు, గింజల మిశ్రమంలో వేసి బాగా కలుపుకోవాలి.
వండే పద్ధతి
ఇలా సిద్ధం చేసుకున్న మసాలా మిశ్రమాన్ని స్పూన్తో తీసుకుని కాకరకాయల లోపల స్టఫ్ చేయాలి. ఆ తర్వాత ఒక కడాయిలో ఆవాల నూనె వేసి వేడి చేయాలి. నూనె వేడెక్కిన తర్వాత స్టఫ్ చేసిన కాకరకాయలను అందులో వేసి మూత పెట్టాలి. కొద్దిసేపటి తర్వాత వాటిని జాగ్రత్తగా తిరగేస్తూ మిగిలిన స్టఫింగ్ మిశ్రమాన్ని కూడా కడాయిలో వేసి బాగా ఉడికించాలి. కాకరకాయలు పూర్తిగా మెత్తబడే వరకు మగ్గనిచ్చి ఆ తర్వాత దించి వేడివేడి రొట్టెలతో సర్వ్ చేస్తే ఈ వేసవిలో అదిరిపోయే రుచి అందుతుంది.