నిజానికి మన జీర్ణవ్యవస్థ గింజలు మొలకెత్తే స్థలం కాదు. పైగా మనం విసిరేస్తున్న ఈ గింజలు అసలు పోషకాహార నిధులని నిపుణులు చెబుతున్నారు. పుచ్చకాయ గింజలు పూర్తిగా సురక్షితమే. వాటిని అలాగే మింగితే అవి ఫైబర్లా పనిచేసి జీర్ణవ్యవస్థలో పెద్దగా మార్పు లేకుండా బయటకు వెళ్లిపోతాయి. కానీ వీటిని సరైన విధంగా తీసుకుంటే శరీరానికి అవసరమైన అద్భుతమైన పోషక విలువలు అందుతాయి. ఆ ఆసక్తికరమైన విశేషాలు తెలుసుకుందాం.
అనేక పోషకాలకు నెలవు
చిన్నవిగా కనిపించినా పుచ్చకాయ గింజల్లో ప్రోటీన్ సుమారు 30 శాతం వరకు ఉంటుంది. ఇందులో ఉండే అర్జినిన్ అనే అమినో ఆమ్లం గుండె ఆరోగ్యానికి ఎంతో మేలు చేస్తుంది. వీటిలో ఉండే మోనో, పాలీ అన్సాచురేటెడ్ ఫ్యాట్స్ రక్తంలోని చెడు కొలెస్ట్రాల్ను తగ్గించడంలో సహాయపడతాయి. మెగ్నీషియం, జింక్, ఐరన్ వంటి ఖనిజాలు శరీరానికి అవసరమైన శక్తిని అందిస్తాయి. ముఖ్యంగా రక్తహీనత సమస్య ఉన్నవారికి ఇవి సహజ పరిష్కారంగా ఉపయోగపడతాయి. వేసవిలో శరీరానికి హైడ్రేషన్ అవసరం ఎక్కువగా ఉంటుంది, ఈ గింజల్లో ఉండే యాంటీఆక్సిడెంట్లు చర్మాన్ని రక్షించి సహజమైన మెరుపును పెంచుతాయి.
శరీర మెటబాలిజం మెరుగుదల
వేడి కాలంలో గుండెపై పడే ఒత్తిడిని తగ్గించడంలో ఇందులోని మెగ్నీషియం కీలక పాత్ర పోషిస్తుంది. వీటిలో ఉండే బి విటమిన్లు మెటబాలిజాన్ని మెరుగుపరిచి ఆహారాన్ని శక్తిగా మార్చడంలో తోడ్పడతాయి. మధ్యాహ్నం వేళల్లో వచ్చే అలసటను తగ్గించడంలో కూడా ఇవి ఉపయోగపడతాయి. సాధారణంగా భారతీయ వంటకాలలో ఇతర గింజలను మిఠాయిల్లో, కర్రీల్లో వాడే సంప్రదాయం ఉన్నప్పటికీ, పుచ్చకాయ గింజలు మాత్రం ఎక్కువగా వృథా అవుతున్నాయి. మొక్కల ఆధారిత ప్రోటీన్ పెంచుకోవాలనుకునే వారికి ఇవి ఉత్తమమైన ఎంపిక.
ఎలా తీసుకోవాలి?
పుచ్చకాయ గింజలు మేలు చేసేవే అయినప్పటికీ వాటిని నేరుగా మింగడం వల్ల పూర్తి ప్రయోజనం అందదు. గింజల పై పొల గట్టిగా ఉండటం వల్ల వాటిని మొలకెత్తించడం ఉత్తమ పద్ధతి. రాత్రంతా నానబెట్టి, రెండు రోజులు మొలకలు వచ్చాక ఎండబెట్టి లేదా వేయించుకుని తినవచ్చు. సులభంగా తినాలంటే గింజలను శుభ్రం చేసి కొద్దిగా నెయ్యి లేదా నూనెలో వేసి ఉప్పు, కారం, ఆమ్ చూర్ కలిపి వేయించుకోవచ్చు. ఇవి సన్ఫ్లవర్ గింజల మాదిరిగా రుచిగా ఉంటాయి. వీటిని ఉప్మా, సలాడ్స్ లేదా స్మూతీలలో కూడా కలుపుకోవచ్చు.
తీసుకోవాల్సిన జాగ్రత్తలు
ఏ పదార్థమైనా మితంగా తీసుకోవడం చాలా ముఖ్యం. పుచ్చకాయ గింజలను ఎక్కువగా తీసుకుంటే అందులోని ఫైబర్ కారణంగా పొట్ట ఉబ్బరం వంటి సమస్యలు రావచ్చు. ముఖ్యంగా సున్నితమైన జీర్ణవ్యవస్థ ఉన్నవారు వేయించిన లేదా మొలకెత్తించిన గింజలనే ఎంచుకోవాలి. ఇవి అధిక క్యాలరీలతో కూడినవి కావడంతో రోజుకు చిన్న మోతాదులో అంటే 25-30 గ్రాములు తీసుకుంటే సరిపోతుంది. ఈ వేసవిలో పుచ్చకాయ గింజలను వృథా చేయకుండా ఆహారంలో భాగం చేసుకుంటే శరీరానికి సహజంగా శక్తి, పోషణ లభిస్తాయి. చిన్న గింజలలో దాగి ఉన్న పెద్ద ప్రయోజనాలను గుర్తించి ఆరోగ్యంగా ఉండండి.