కావలసిన పదార్థాలు: 1 కప్పు శనగపిండి, అర కప్పు కరిగించిన స్వచ్ఛమైన నెయ్యి, నీటిలో నానబెట్టిన పావు కప్పు జీడిపప్పు, 1 కప్పు పచ్చి పాలు, 3 నుండి 4 యాలకులు, 1 కప్పు
పంచదార, 2 నుండి 3 టేబుల్ స్పూన్ల బెల్లం తురుము, 1 చిటికెడు కుంకుమపువ్వు
తయారీ విధానం: మిక్సీ జార్‌లో పావు కప్పు నానబెట్టిన జీడిపప్పు, 1 కప్పు పచ్చి పాలు, 3-4 యాలకులు వేయాలి. వీటిని మెత్తని నునుపైన పేస్ట్‌లా గ్రైండ్ చేసి పక్కన పెట్టుకోవాలి. ఒక గిన్నెలో 1 కప్పు శనగపిండి తీసుకోవాలి. ఇందులో అర కప్పు నెయ్యిలో నుండి పావు కప్పు కరిగించిన నెయ్యిని వేసి ఉండలు లేకుండా చిక్కటి పేస్ట్‌లా బాగా కలపాలి.
ఇప్పుడు అడుగు మందంగా ఉండే కడాయిని స్టవ్‌పై పెట్టి, ఈ శనగపిండి మిశ్రమాన్ని వేయాలి. మంటను పూర్తిగా లో ఫ్లేమ్‌లో ఉంచి గరిటెతో ఆపకుండా కలుపుతూ 7 నుండి 8 నిమిషాలు వేయించాలి. శనగపిండి పొంగి కమ్మటి సువాసన వస్తూ రంగు మారడం మొదలవుతుంది. ఆ సమయంలో మిగిలిన నెయ్యిలోంచి మరో 2 టేబుల్ స్పూన్ల నెయ్యి వేసి పొంగించాలి.
ఇప్పుడు మంటను మీడియం ఫ్లేమ్‌కి అడ్జస్ట్ చేసి.. గ్రైండ్ చేసి పెట్టుకున్న జీడిపప్పు పేస్ట్‌ను పోసి బాగా కలపాలి. అడుగు పట్టకుండా మీడియం మంటపై 8-10 నిమిషాలు నిరంతరం కలుపుతూ వేయించాలి. మిశ్రమం దగ్గరపడి మంచి క్యారమెల్ గోల్డెన్ రంగులోకి వస్తుంది. మిశ్రమం రంగు మారిన తర్వాత.. 1 కప్పు పంచదారలోంచి సగం (అర కప్పు) పంచదార వేసి కలపాలి. ఇది కాస్త దగ్గరపడిన వెంటనే 2-3 టేబుల్ స్పూన్ల బెల్లం తురుము వేయాలి.ఈ కొద్ది బెల్లం స్వీట్‌కు అత్యంత అద్భుతమైన ఫ్లేవర్‌ను ఇస్తుంది. బెల్లం కరిగాక మిగిలిన అర కప్పు పంచదార మరియు మరో టేబుల్ స్పూన్ నెయ్యి వేసి కలపాలి
తిరుపాగం దగ్గరపడి నెయ్యి అంచుల వెంట విడివడుతున్నప్పుడు.. మిగిలిన నెయ్యి మరియు వేడి నీటిలో నానబెట్టిన కుంకుమపువ్వు నీటిని వేసి బాగా కలపాలి. నెయ్యి పూర్తిగా బయటకు తేలి హల్వా పదం రాగానే స్టవ్ ఆఫ్ చేయాలి. అంతే, దేవాలయాల తరహా అమృతతుల్యమైన 'తిరుపాగం' ప్రసాదం సిద్ధం! అరటి ఆకు లేదా ఇత్తడి పళ్లెంలో ఉంచి పైన కుంకుమపువ్వు, జీడిపప్పులతో అలంకరించి అమ్మవారికి నైవేద్యంగా సమర్పించి ఆస్వాదించండి!