హైదరాబాద్, సెప్టెంబర్ 11: స్టాఫ్ సెలక్షన్ కమిషన్ (SSC) వరుసగా భారీ ఉద్యోగ నోటిఫికేషన్లు విడుదల చేస్తోంది. ఇంటర్మీడియట్, డిప్లొమా, డిగ్రీ విద్యార్హతలు కలిగిన అభ్యర్థులకు కేంద్ర ప్రభుత్వ శాఖల్లో ఉద్యోగాలు సాధించేందుకు ఇది మంచి అవకాశంగా మారింది. జూనియర్ ఇంజినీర్, కంబైన్డ్ హయ్యర్ సెకండరీ లెవల్ (CHSL), దిల్లీ పోలీస్, సీఏపీఎఫ్ ఎస్ఐ తదితర విభాగాల్లో మొత్తం 6,155 ఖాళీల భర్తీకి నోటిఫికేషన్లు వెలువడ్డాయి.
జూనియర్ ఇంజినీర్ పోస్టులు
SSC జూనియర్ ఇంజినీర్ (JE) పరీక్ష-2026 నోటిఫికేషన్ ద్వారా 1,748 పోస్టులను భర్తీ చేయనున్నారు. ఇంజినీరింగ్ విభాగంలో అర్హత కలిగిన అభ్యర్థులు ఈ పోస్టులకు పోటీపడవచ్చు.
CHSL ద్వారా 2,536 పోస్టులు
కంబైన్డ్ హయ్యర్ సెకండరీ లెవల్ ఎగ్జామినేషన్ (CHSL) 2026 ద్వారా 2,536 పోస్టులు భర్తీ చేయనున్నారు. ఇందులో లోయర్ డివిజన్ క్లర్క్ (LDC), జూనియర్ సెక్రటేరియట్ అసిస్టెంట్ (JSA), డేటా ఎంట్రీ ఆపరేటర్ (DEO) వంటి పోస్టులు ఉన్నాయి. ఇంటర్మీడియట్ విద్యార్హత కలిగిన అభ్యర్థులకు ఈ నోటిఫికేషన్ ముఖ్యమైన అవకాశం.
ఇవి కూడా చదవండి
దిల్లీ పోలీస్, CAPFలో 1,871 ఎస్ఐ పోస్టులు
దిల్లీ పోలీస్, సెంట్రల్ ఆర్మ్డ్ పోలీస్ ఫోర్సెస్ (CAPF)లో సబ్-ఇన్స్పెక్టర్ (SI) పోస్టుల భర్తీకి కూడా SSC నోటిఫికేషన్ విడుదల చేసింది. ఈ నియామకం ద్వారా 1,871 ఎస్ఐ పోస్టులను భర్తీ చేయనున్నారు. డిగ్రీ అర్హత కలిగిన అభ్యర్థులు ఈ పోస్టులకు దరఖాస్తు చేసుకునే అవకాశం ఉంది.
ఇలా ఒకేసారి వివిధ విభాగాల్లో వేలాది ఉద్యోగ ఖాళీలు అందుబాటులోకి రావడంతో కేంద్ర ప్రభుత్వ ఉద్యోగాల కోసం సిద్ధమవుతున్న అభ్యర్థులకు మంచి అవకాశం లభించింది. పోస్టును బట్టి విద్యార్హత, వయోపరిమితి, ఎంపిక విధానం, దరఖాస్తు గడువు తదితర నిబంధనలు మారుతాయి. అభ్యర్థులు సంబంధిత SSC నోటిఫికేషన్ను పూర్తిగా పరిశీలించి, అర్హతలు ఉన్నాయో లేదో నిర్ధారించుకున్న తర్వాత దరఖాస్తు చేసుకోవాలి.