సాధారణంగా మనం ఆరోగ్యంగా ఉండాలంటే 7-8 గంటలు నిద్రపోవాలని అంటుంటారు. కానీ కొందరు మాత్రం నిద్ర అనేది వ్యక్తి వయస్సు, ఆరోగ్యంపై ఆధారపడి ఉంటుందని చెబుతారు. దీనివల్ల చాలా మందిలో ఆరోగ్యంగా ఉండేందుకు సరైన నిద్ర సమయం ఏదో తెలియక గందరగోళానికి గురవుతుంటారు. ఈ క్రమంలో ఇటీవల ఆచార్య బాలకృష్ణ ఒక వీడియో ద్వారా ఈ విషయాలపై స్పష్టతనిచ్చారు. ఆయుర్వేదం ప్రకారం మనిషి ఆరోగ్యంగా ఉండటానికి 7, 8 లేదా 9 గంటల్లో ఏది సరైనదో వివరించారు.
ఆరోగ్యంగా ఉండేందుకు ఎన్ని గంటల నిద్ర అవసరం?: ఆచార్య బాలకృష్ణ తెలిపిన వివరాల ప్రకారం.. మీకు గనుక 6 గంటల కంటే తక్కువ నిద్ర పడితే, మీకు ఏదో ఒక అనారోగ్య సమస్య ఉందని అర్థం చేసుకోవాలి. అదే సమయంలో మీరు గనుక 8 గంటల కంటే ఎక్కువ సమయం నిద్రిస్తుంటే, శరీరంలో ఏదో లోపం లేదా సమస్య ఉందని గ్రహించాలి అని తెలిపారు. ఆయుర్వేదం ప్రకారం ఒక వ్యక్తి కనీసం 6 గంటల నుండి గరిష్టంగా 8 గంటల వరకు నిద్రపోవాలని ఆయన తెలిపారు. ఆరోగ్యంగా ఉండటానికి ఈ సమయం సరిపోతుందని. మీ దినచర్యను బట్టి మీరు ఈ మధ్యలో సమయాన్ని కేటాయించుకోవచ్చన్నారు.
నిద్ర నాణ్యత కూడా ముఖ్యం: కేవలం 6 లేదా 8 గంటలు పడుకోవడం మాత్రమే ముఖ్యం కాదు, మీరు ఎంత ప్రశాంతంగా, గాఢంగా నిద్రపోతున్నారనేది కూడా అంతే ముఖ్యమని ఆయన తెలిపారు. ఆయుర్వేదం ప్రకారం, గాఢ నిద్రపోయే వారిలో ఆనందం, పుష్టి, తేజస్సు, బలం, పౌరుషం పెరుగుతాయని ఆయన తెలిపారు. అలాంటి వారిలో ఓజస్సు, కాంతి, జ్ఞానం, ఆయుష్షు కూడా పెరుగుతుందన్నారు.
నిద్రించడానికి సరైన సమయం ఏది?: ఎన్ని గంటలు నిద్రపోతున్నామనే దానితో పాటు, ఏ సమయానికి నిద్రపోతున్నామనేది కూడా చాలా ముఖ్యమని ఆయన చెబుతున్నారు. ఎందుకంటే తప్పుడు సమయంలో నిద్రించడం వల్ల నిద్ర నాణ్యత దెబ్బతింటుందని చెబుతున్నారు. ఆచార్య బాలకృష్ణ ప్రకారం, రాత్రి 10 గంటలకల్లా నిద్రపోవడం మంచిది. ఎందుకంటే రాత్రి 10 గంటల నుండి ఉదయం 4 గంటల మధ్య సమయం నిద్రకు చాలా అనుకుకూలంగా ఉంటుందని ఆయన తెలిపారు..
దీనివల్ల మీ 6 గంటల నిద్ర సులభంగా పూర్తవుతుంది. ఉదయం 4 గంటల బ్రహ్మ ముహూర్తంలో నిద్ర లేచి మీ రోజువారీ పనులను ఉత్సాహంగా చేసుకోవచ్చు. ఒకవేళ మీరు బాగా బిజీగా ఉంటే, కనీసం రాత్రి 11 గంటలకైనా పడుకోవడానికి ప్రయత్నించండి. అంతకంటే ఎక్కువ ఆలస్యం చేయడం ఆరోగ్యానికి మంచిది కాదని ఆయన చెబుతున్నారు.