అసలు విషయం ఏమిటంటే చాలా మందికి కుక్కర్ను ఎలా ఉపయోగించాలో తెలియదు. చిన్న నిర్లక్ష్యం, అజాగ్రత్త వల్ల కుక్కర్ పేలిపోయే ప్రమాదం ఉంది. అందువల్ల కుక్కర్లో వంట చేసేటప్పుడు ఈ కింది జాగ్రత్తలు తీసుకోవడం చాలా అవసరం.
గాస్కెట్ రబ్బరును నిర్లక్ష్యం చేయడం
ప్రెషర్ కుక్కర్లో రబ్బరు గాస్కెట్, విజిల్ చాలా అవసరం. ఇవి రెండూ కలిసి లోపలి పీడనాన్ని నియంత్రించి, అదనపు ఆవిరిని విడుదల చేస్తాయి. కానీ చాలా మంది గాస్కెట్ రబ్బరు వదులుగా అయినా, అరిగిపోయినా దానిని మార్చరు. దీనివల్ల ప్రెషర్ కుక్కర్ లోపల పీడనం పెరిగి, కుక్కర్ పేలిపోయే ప్రమాదం ఉంది. కాబట్టి విజిల్, గాస్కెట్ను క్రమం తప్పకుండా తనిఖీ చేస్తుండాలి. అవసరమైతే వాటిని వెంటనే మార్చేయాలి.
కుక్కర్ను నిండుగా నింపడం
చాలా మంది కుక్కర్ సామర్థ్యం కంటే ఎక్కువ ఆహారాన్ని అందులో నింపుతారు. కుక్కర్ పూర్తిగా నిండే వరకు అన్నం, కూరగాయలను అందులో వండకూడదు. ఇలా చేయడం వల్ల కుక్కర్ లోపల ఏర్పడిన ఆవిరి బయటకు వెళ్ళడానికి మార్గం ఉండదు. దీనివల్ల పీడనం వేగంగా పెరుగుతుంది. ఇది కుక్కర్ పేలిపోవడానికి కారణం కావచ్చు. అందువల్ల కుక్కర్ను ఎల్లప్పుడూ దాని సామర్థ్యంలో 2/3 వంతు వరకు మాత్రమే ఆహారంతో నింపాలి.
ఇవి కూడా చదవండి
విజిల్ శుభ్రం చేయకపోవడం
కుక్కర్లో ఒత్తిడిని విడుదల చేయడానికి విజిల్ ఒక ముఖ్యమైన భాగం. దానిలో మురికి, ఆహార కణాలు ఇరుక్కుపోతే అది సరిగ్గా పనిచేయదు. దీనివల్ల ఆవిరి బయటకు వెళ్లదు. ఫలితంగా కుక్కర్ లోపల ఒత్తిడి పెరిగి, కుక్కర్ పేలిపోయే ప్రమాదం పెరుగుతుంది. అందువల్ల ప్రతి సారి వినియోగించిన తర్వాత విజిల్ను క్షుణ్ణంగా శుభ్రం చేయాలి. వెంట్ పైపులో ఎటువంటి అడ్డంకి లేకుండా చేసుకోవాలి.
తక్కువ నీరు కలపడం
కొంతమంది కుక్కర్లో వంట చేసేటప్పుడు అవసరమైన దానికంటే తక్కువ నీళ్లు కలుపుతారు. దీనివల్ల ఆహారం మాడిపోవడమే కాకుండా, లోపల అధిక వేడి కూడా పుడుతుంది. దీని వలన కుక్కర్ అతిగా వేడెక్కి పేలిపోయే ప్రమాదం ఉంది. కాబట్టి వంట చేసేటప్పుడు సరైన మోతాదులో నీళ్లు కలపాలి.
పాత ప్రెషర్ కుక్కర్ను ఉపయోగించడం
కొంతమంది చాలా ఏళ్ల నాటి కుక్కర్లను వాడుతుంటారు. పాత ప్రెషర్ కుక్కర్లో వంట చేయడం చాలా ప్రమాదకరం. ఎందుకంటే కాలక్రమేణా కుక్కర్ మూత, లాక్ వ్యవస్థ బలహీనపడిపోయి పేలిపోవచ్చు. కాబట్టి, కుక్కర్ను క్రమం తప్పకుండా తనిఖీ చేసుకుంటూ ఉండాలి. ఎల్లప్పుడూ ISI మార్క్ ఉన్న మంచి నాణ్యత గల కుక్కర్లను మాత్రమే ఉపయోగించాలి.
మరిన్ని ఆరోగ్య కథనాల కోసం ఇక్కడ క్లిక్ చేయండి.