జుట్టు దృఢంగా, ఆరోగ్యంగా పెరగడానికి తలకు నూనె రాయడం ఎంతో ముఖ్యం. అయితే దీనిని సరైన సమయంలో చేయడం వల్లనే పూర్తి ఫలితం లభిస్తుందని నిపుణులు చెబుతున్నారు. నూనె రాయడం వల్ల జుట్టుకు కావలసిన పోషణ లభించడమే కాకుండా తలలో తేమ అందుతుంది. దీంతో మీ జుట్టు ఒత్తుగా, బలంగా, పొడుగ్గా పెరుగుతుంది.
హెయిర్ కేర్ నిపుణుల ప్రకారం, జుట్టుకు నూనె రాయడానికి రాత్రి సమయం (Night Time) అత్యంత అనుకూలమైనదిగా చెబుతున్నారు. ఎందుకంటే.. రాత్రి వేళల్లో మన శరీరం విశ్రాంతి స్థితిలో ఉంటుంది. ఈ సమయంలో నూనె రాయడం వల్ల జుట్టు కుదుళ్లు (Hair Follicles) నూనెను లోపలి వరకు పీల్చుకోవడానికి తగినంత సమయం లభిస్తుంది.
గోరువెచ్చని నూనెతో రాత్రి పూట తలపై తేలికగా మసాజ్ చేయడం వల్ల రోజంతా ఉన్న అలసట, మానసిక ఒత్తిడి తగ్గి ప్రశాంతమైన, గాఢమైన నిద్ర పడుతుంది. మసాజ్ చేయడం వల్ల తలలో రక్తప్రసరణ మెరుగై, జుట్టు వేగంగా పెరగడానికి సహాయపడుతుంది.
పగటిపూట నూనె రాస్తే ఏమవుతుంది?: చాలామంది ఉదయం పూట నూనె రాసుకుని బయటకు వెళ్తుంటారు. కానీ, వేసవి కాలంలో లేదా పగటిపూట నూనె రాసుకుని బయట తిరగడం వల్ల వాతావరణంలో ఉండే ధూళి, కాలుష్యం (Dust and Pollution) ఆ నూనె జిడ్డుకు తలలో త్వరగా పేరుకుపోతాయి. ఇది కుదుళ్లను మూసివేసి (Clogged Pores) జుట్టు రాలడం, చుండ్రు వంటి సమస్యలకు దారితీస్తుంది. ఒకవేళ మీకు రాత్రి పూట నూనె రాయడం ఇష్టం లేకపోతే.. తలస్నానం చేయడానికి కనీసం 1 నుండి 2 గంటల ముందు పగటిపూట నూనె రాసుకోవచ్చు.
అయితే, కొందరు వారమంతా తలకు నూనెను అలాగే ఉంచుతారు. దీనివల్ల స్కాల్ప్పై మురికి చేరి ఇన్ఫెక్షన్లు వచ్చే ప్రమాదం ఉంది. రాత్రి నూనె రాస్తే, మరుసటి రోజు ఉదయాన్నే తలస్నానం చేయడం మంచిది. జుట్టుకు నూనె రాసేటప్పుడు ఎప్పుడూ నూనెను కాస్త గోరువెచ్చగా చేసి రాస్తే మంచి ఫలితం ఉంటుంది. నూనెను శుభ్రం చేయడానికి రసాయనాలు ఎక్కువగా లేని మైల్డ్ లేదా హెర్బల్ షాంపూలను ఉపయోగించండి.