Malinda Pushpakumara : శ్రీలంక దేశవాళీ క్రికెట్ దిగ్గజం, లెఫ్ట్ హ్యాండ్ స్పిన్నర్ మలింద పుష్పకుమార క్రికెట్ చరిత్రలో తన పేరును సువర్ణాక్షరాలతో లిఖించుకున్నాడు. ఫస్ట్ క్లాస్ క్రికెట్లో 1,000 వికెట్లు తీసిన అరుదైన రికార్డును ఈ స్పిన్ మాంత్రికుడు సొంతం చేసుకున్నాడు. కొలంబోలోని కోల్ట్స్ క్రికెట్ క్లబ్ మైదానంలో మూర్ స్పోర్ట్స్ క్లబ్తో జరిగిన మ్యాచ్లో సోహన్ డి లివేరా, పాసిందు సూర్యబండారలను అవుట్ చేయడం ద్వారా పుష్పకుమార ఈ అద్భుతమైన మైలురాయిని చేరుకున్నాడు. ఈ ఘనత సాధించిన నాలుగో శ్రీలంక బౌలర్గా ఆయన రికార్డు సృష్టించాడు.
శ్రీలంక తరపున ఫస్ట్ క్లాస్ క్రికెట్లో 1000 వికెట్లు తీసిన బౌలర్ల జాబితా చాలా చిన్నది. ఇంతకుముందు ముత్తయ్య మురళీధరన్ (1374 వికెట్లు), రంగనా హెరాత్ (1080 వికెట్లు), దినూక హెట్టియారాచ్చి (1001 వికెట్లు) మాత్రమే ఈ క్లబ్లో ఉండగా, ఇప్పుడు మలింద పుష్పకుమార కూడా వారి సరసన చేరాడు. ప్రపంచవ్యాప్తంగా చూస్తే, ఫస్ట్ క్లాస్ క్రికెట్ చరిత్రలో ఈ ఘనత సాధించిన 218వ ఆటగాడు పుష్పకుమార కావడం విశేషం.
పుష్పకుమార రికార్డుల్లో అత్యంత ఆశ్చర్యకరమైన విషయం ఏమిటంటే అతని స్ట్రైక్ రేట్. వికెట్లు తీసే వేగంలో ఆయన సాక్షాత్తు లెజెండరీ స్పిన్నర్ ముత్తయ్య మురళీధరన్ కంటే ముందున్నాడు. మురళీధరన్ ప్రతి 48.7 బంతులకు ఒక వికెట్ తీయగా, పుష్పకుమార కేవలం 38.3 బంతుల్లోనే ఒక వికెట్ పడగొట్టాడు. అతని బౌలింగ్ సగటు కూడా కేవలం 20.06 మాత్రమే. తన సుదీర్ఘ కెరీర్లో ఆయన 86 సార్లు ఒకే ఇన్నింగ్స్లో ఐదు వికెట్లు, 28 సార్లు ఒకే మ్యాచ్లో 10 వికెట్లు తీసి తన సత్తా చాటుకున్నాడు.
పుష్పకుమార పేరు వినగానే క్రికెట్ ప్రేమికులకు గుర్తొచ్చే మరో అద్భుత రికార్డు 2019 నాటిది. జనవరి 2019లో సారసెన్స్ స్పోర్ట్స్ క్లబ్పై జరిగిన మ్యాచ్లో ఆయన ఒకే ఇన్నింగ్స్లో మొత్తం 10 వికెట్లు పడగొట్టి చరిత్ర సృష్టించాడు. కేవలం 37 పరుగులు ఇచ్చి ప్రత్యర్థి జట్టును కుప్పకూల్చిన ఈ స్పిన్నర్, అప్పుడే తన వికెట్ల వేటలో 700 మార్కును దాటేశాడు. వరుసగా 18.4 ఓవర్లు బౌలింగ్ చేసి విరామం లేకుండా వికెట్లు తీసిన తీరు క్రికెట్ ప్రపంచాన్ని అప్పట్లో ఆశ్చర్యపరిచింది.
ఇంతటి అద్భుతమైన రికార్డులు ఉన్నప్పటికీ, పుష్పకుమారకు శ్రీలంక జాతీయ జట్టు తరపున ఆడే అవకాశాలు మాత్రం తక్కువగానే వచ్చాయి. రంగనా హెరాత్ వంటి దిగ్గజాలు జట్టులో ఉండటంతో పుష్పకుమార కేవలం 4 టెస్టులు మాత్రమే ఆడగలిగాడు. అందులో 14 వికెట్లు తీశాడు. రెండు వన్డేలు ఆడి ఒక వికెట్ పడగొట్టాడు. అయినప్పటికీ దేశవాళీ క్రికెట్లో ఆయన ఒక ఛాంపియన్గా ఎదిగి, వేల సంఖ్యలో వికెట్లు తీసి నేటి తరం బౌలర్లకు స్ఫూర్తిగా నిలుస్తున్నాడు.