శతాబ్దాలుగా భారతీయ ఇళ్లలో పసుపు పాలు ఒక సంప్రదాయ ఔషధంగా కొనసాగుతున్నాయి. రోగనిరోధక శక్తిని పెంచడంలో, గాయాలను మాన్పడంలో, రాత్రిపూట మంచి నిద్రను అందించడంలో దీనికి మించిన చిట్కా లేదని నమ్ముతారు. పసుపులో ఉండే కర్కుమిన్ అనే పదార్థంలోని యాంటీ-ఇన్ఫ్లమేటరీ, యాంటీఆక్సిడెంట్ గుణాలు శరీరానికి ఎంతో మేలు చేస్తాయి. అయితే ఆరోగ్యకరమైన ఈ పానీయాన్ని తప్పుడు పద్ధతిలో లేదా తప్పుడు సమయంలో తీసుకుంటే శరీరానికి హాని కలుగుతుందని ఆరోగ్య నిపుణులు హెచ్చరిస్తున్నారు.
పసుపు పాలు తాగేటప్పుడు మనం చేసే అతిపెద్ద తప్పులు ఇవే
తాగిన వెంటనే నిద్రపోవడం
చాలా మందికి పసుపు పాలు తాగిన వెంటనే పడుకునే అలవాటు ఉంటుంది. కానీ పాలు జీర్ణం కావడానికి చాలా సమయం పడుతుంది. పాలు తాగిన వెంటనే నిద్రపోతే జీర్ణక్రియ మందగించి ఎసిడిటీ, కడుపు ఉబ్బరం, యాసిడ్ రిఫ్లక్స్ వంటి సమస్యలు తలెత్తుతాయి. పడుకోవడానికి కనీసం 1-2 గంటల ముందే పాలు తాగడం ఉత్తమం.
మోతాదుకు మించి వాడటం:
ఎక్కువ పసుపు వాడితే ఎక్కువ ఆరోగ్యం అనుకోవడం పొరపాటు. పసుపును అధికంగా తీసుకోవడం వల్ల కడుపులో అసౌకర్యం, గ్యాస్, కడుపు నొప్పి, కొన్ని సందర్భాల్లో విరేచనాలు కూడా సంభవించవచ్చు. రోజుకు చిటికెడు లేదా అర స్పూన్ కంటే ఎక్కువ పసుపు వాడకూడదు.
పరగడుపున తాగడం
కొంతమంది ఖాళీ కడుపుతో పసుపు పాలు తాగుతుంటారు. సున్నితమైన కడుపు ఉన్నవారికి ఇది సరిపడదు. దీనివల్ల కడుపులో చికాకు, ఎసిడిటీ లేదా అసౌకర్యం కలగవచ్చు.
వీరు పసుపు పాలకు దూరంగా ఉండాలి
పసుపు పాలు అందరికీ ప్రయోజనకరమైనవి కావు. ముఖ్యంగా ఈ క్రింది సమస్యలు ఉన్నవారు వీటిని నివారించాలి.
పిత్తాశయ సమస్యలు: గాల్ బ్లాడర్లో రాళ్లు లేదా ఇతర సమస్యలు ఉన్నవారు.
మందులు వాడేవారు: రక్తం పలుచబరిచే మందులు వాడుతున్న వ్యక్తులు.
ఇనుము లోపం: రక్తహీనత లేదా ఐరన్ లోపం ఉన్నవారు.
కిడ్నీ సమస్యలు: మూత్రపిండాల్లో రాళ్ల సమస్యతో బాధపడుతున్న వారు.
సరిగ్గా తయారు చేయడం ఎలా?
పసుపు పాలలోని పూర్తి ప్రయోజనాలు శరీరానికి అందాలంటే ఒక చిన్న చిట్కా పాటించాలి. పసుపు పాలు తయారు చేసేటప్పుడు అందులో కొద్దిగా నల్ల మిరియాల పొడి కలపండి. మిరియాలు కలపడం వల్ల పసుపులోని కర్కుమిన్ను శరీరం త్వరగా గ్రహిస్తుంది.