నేటి ఆధునిక, వేగవంతమైన జీవనశైలిలో బరువు పెరగడం అనేది మెజారిటీ ప్రజలు ఎదుర్కొంటున్న అతిపెద్ద సమస్య. పెరిగిన బరువును తగ్గించుకోవడానికి, ముఖ్యంగా పొట్ట చుట్టూ పేరుకుపోయిన కొవ్వును కరిగించుకోవడానికి చాలా మంది కఠినమైన వ్యాయామాలు చేస్తుంటారు. ఈ క్రమంలోనే అన్నం తింటే త్వరగా లావు అయిపోతామనే భయంతో.. చాలా మంది అన్నాన్ని పూర్తిగా పక్కన పెట్టేసి కేవలం రొట్టెలు తినడం ప్రారంభిస్తారు. రొట్టెలు తింటేనే బరువు తగ్గుతామనేది ఒక సాధారణ నమ్మకం. అయితే ఈ నమ్మకంలో ఎంతవరకు నిజం ఉంది? బరువు పెరగడానికి లేదా తగ్గడానికి కేవలం అన్నం, రొట్టెలు మాత్రమే కారణమా? దీనిపై జై ప్రభా మెదాంత సూపర్ స్పెషాలిటీ హాస్పిటల్కు చెందిన ప్రముఖ డైటీషియన్ ప్రియా దుబే కీలక విషయాలు వెల్లడించారు.
అసలు తేడా ఏమిటి?
పోషకాహార నిపుణురాలి సమాచారం ప్రకారం.. అన్నం, గోధుమ రొట్టెకు మధ్య ఉన్న ప్రధాన వ్యత్యాసాలు ఇవే..
అన్నం: అన్నం చాలా సులభంగా, త్వరగా జీర్ణమవుతుంది. కానీ ఇందులో పీచుపదార్థం, ప్రోటీన్ చాలా తక్కువగా ఉంటాయి.
రొట్టె : గోధుమ రొట్టెలో పీచుపదార్థం అధికంగా ఉంటుంది. దీనితో పాటు ప్రోటీన్, బి విటమిన్లు కూడా లభిస్తాయి. ఫైబర్ ఎక్కువగా ఉండటం వల్ల ఇది కడుపును ఎక్కువ సేపు నిండుగా ఉంచుతుంది. తరచుగా వచ్చే ఆకలి బాధలను తగ్గిస్తుంది.
కేలరీల లెక్కలు ఏం చెబుతున్నాయి?
రోటీ కేలరీలు: ఒక సాధారణ గోధుమ రొట్టెలో దాదాపు 70 నుండి 100 కేలరీలు ఉంటాయి.
రైస్ కేలరీలు: ఒక కప్పు వండిన అన్నంలో దాదాపు 130 నుండి 200 కేలరీలు ఉంటాయి. అయితే ఇది మనం తీసుకునే అన్నం రకం, దాని పరిమాణంపై ఆధారపడి ఉంటుంది. ఉదాహరణకు తెల్ల బియ్యంలో పీచుపదార్థం తక్కువగా ఉంటుంది. అదే బ్రౌన్ రైస్లో పీచుపదార్థం, ఇతర పోషకాలు ఎక్కువగా ఉంటాయి.
అయితే కేవలం కేలరీల ఆధారంగానే ఒక ఆహారం మంచిదా లేదా చెడ్డదా అని చెప్పలేమని, మనం ఎంత పరిమాణంలో తింటున్నాం, దానితో పాటు ఎలాంటి సైడ్ డిషెస్ తింటున్నాం అనేదే అత్యంత ముఖ్యమని నిపుణులు స్పష్టం చేస్తున్నారు.
రక్తంలో చక్కెర స్థాయిలపై వీటి ప్రభావం ఎలా ఉంటుంది?
తెల్ల బియ్యానికి గ్లైసెమిక్ ఇండెక్స్ చాలా ఎక్కువగా ఉంటుంది. దీనివల్ల ఇది తిన్న వెంటనే రక్తంలో చక్కెర స్థాయిలు వేగంగా పెరుగుతాయి. అయితే దీనికి ఒక అద్భుతమైన పరిష్కారం ఉంది. అన్నాన్ని ఒంటిగా తినేయకుండా పప్పులు, ఆకుకూరలు, పెరుగు లేదా ప్రోటీన్ ఎక్కువగా ఉండే ఆహారాలతో కలిపి తింటే రక్తంలో చక్కెర పెరగడాన్ని సులభంగా నియంత్రించవచ్చు. అదేవిధంగా ప్రోటీన్, ఫైబర్ పుష్కలంగా ఉండే రోటీని కూడా సమతుల్య ఆహారంతో కలిపి తీసుకోవడం వల్ల బరువు తగ్గడానికి తోడ్పడుతుంది.
బరువు తగ్గాలంటే అన్నం పూర్తిగా మానేయాలా?
బరువు తగ్గే ప్రక్రియలో అన్నాన్ని పూర్తిగా మానేయాల్సిన అవసరమే లేదు అని డైటీషియన్ ప్రియా దుబే స్పష్టంగా చెబుతున్నారు. మనం తినే అన్నం పరిమాణాన్ని సరిగ్గా నియంత్రించి, దానికి తగినంత ప్రోటీన్, కూరగాయలు, ఆరోగ్యకరమైన కొవ్వులను జోడించి తింటే, అన్నం కూడా సమతుల్య ఆహారంలో ఒక అద్భుతమైన భాగంగా మారుతుంది.
నిపుణుల అంతిమ సలహా..
బరువు పెరగడానికి లేదా తగ్గడానికి చపాతీ లేదా అన్నం.. ఈ రెండింటిలో ఏదో ఒక ఆహారాన్ని మాత్రమే నిందించడం ముమ్మాటికీ సరికాదు. ఎందుకంటే చపాతీ, అన్నం రెండూ కూడా పిండిపదార్థాలే.
బరువును పర్ఫెక్ట్గా అదుపులో ఉంచుకోవడానికి కేవలం అన్నం మానేస్తే సరిపోదు, పూర్తి జీవనశైలి మారాలి.
- సమతుల్య, పోషక విలువలున్న ఆహారం తీసుకోవడం.
- క్రమం తప్పకుండా వ్యాయామం చేయడం.
- రోజుకు పుష్కలంగా నీరు త్రాగడం.
- తగినంత నిద్రపోవడం.
ఈ నాలుగు సూత్రాలే బరువు తగ్గడానికి ఉన్న ఏకైక, సరైన మార్గాలు. కాబట్టి దేనినో ఒకదాన్ని పూర్తిగా మానేయడానికి బదులుగా, అన్నింటినీ సరైన మోతాదులో తింటూ ఆరోగ్యంగా బరువు తగ్గండి.