రెస్టారెంట్ స్టైల్‌లో నోరూరించే క్రీమీ మఖానా కాజు కర్రీ.. చపాతీ, రోటీలోకి అదిరిపోయే టేస్ట్

కావలసిన పదార్థాలు: 50 గ్రాములు ఫూల్ మఖానా,  15 నుండి 20 పలుకుల జీడిపప్పు, 5 టీస్పూన్ నెయ్యి, 3 టేబుల్ స్పూన్ల వంట నూనె, చిన్న ముక్క దాల్చిన చెక్క, బిర్యానీ ఆకు, 2 యాలకులు, 3 నుండి 4 లవంగాలు, 2 పెద్ద ఉల్లిపాయలు, 1 చిన్న ముక్క అల్లం తరుగు, 10 వెల్లుల్లి రెబ్బలు, 2 పచ్చిమిరపకాయలు,  4 మీడియం సైజు టమాటాలు, అర టీస్పూన్ జీలకర్ర, అర టీస్పూన్ సోంపు గింజలు, అర టీస్పూన్ పసుపు, 1½ టీస్పూన్ కాశ్మీరీ కారం పొడి, 1 టీస్పూన్ జీలకర్ర పొడి, 2 టీస్పూన్ల ధనియాల పొడి, రుచికి సరిపడా ఉప్పు , 1 టీస్పూన్ పంచదార, 2 చిన్న క్యూబ్స్ వెన్న, 1 టీస్పూన్ కసూరి మేథీ, 2 టేబుల్ స్పూన్ల ఫ్రెష్ క్రీమ్

తయారీ విధానం: స్టవ్‌పై కడాయి పెట్టి ఒక టీస్పూన్ నెయ్యి వేసి 50 గ్రాముల మఖానాను వేయాలి. లో-మీడియం మంటపై మఖానా లేత బంగారు రంగులోకి మారి చేత్తో నలిపితే క్రంచీ శబ్దంతో పొడి అయ్యేంత వరకు వేయించి ప్లేట్‌లోకి తీసుకోవాలి. అదే కడాయిలో మరో టీస్పూన్ నెయ్యి వేసి జీడిపప్పులను గోల్డెన్ బ్రౌన్ కలర్ వచ్చేవరకు వేయించి పక్కన ఉంచాలి.

అదే కడాయిలో 1 టేబుల్ స్పూన్ నెయ్యి, 2 టేబుల్ స్పూన్ల నూనె వేడిచేయాలి. దాల్చిన చెక్క, బిర్యానీ ఆకు, యాలకులు, లవంగాలు వేసి చిటపటలాడనివ్వాలి. ఆ తర్వాత తరిగిన ఉల్లిపాయలు, అల్లం, వెల్లుల్లి వేసి 5 నిమిషాలు మగ్గించాలి. ఉల్లిపాయలు మెత్తబడ్డాక పచ్చిమిర్చి, టమాటా ముక్కలు, తగినంత ఉప్పు, జీలకర్ర, సోంపు గింజలు మరియు గ్రేవీ క్రీమీగా రావడం కోసం 8 జీడిపప్పు పలుకులు వేయాలి. టమాటాలు మెత్తగా గుజ్జులా మారే వరకు మగ్గించి స్టవ్ ఆఫ్ చేయాలి. ఈ మిశ్రమంలోంచి బిర్యానీ ఆకు తీసేసి, పూర్తిగా చల్లారాక కొద్దిగా నీళ్లు పోసి మిక్సీలో మెత్తటి ప్యూరీలా గ్రైండ్ చేసుకోవాలి.

 పాన్‌లో 1 టేబుల్ స్పూన్ నెయ్యి, 1 టేబుల్ స్పూన్ నూనె వేసి వేడిచేయాలి. మంటను సిమ్‌లో ఉంచి అర టీస్పూన్ పసుపు, కాశ్మీరీ కారం, జీలకర్ర పొడి, ధనియాల పొడి వేసి మాడకుండా కలపాలి. వెంటనే గ్రైండ్ చేసి పెట్టుకున్న టమాటా-జీడిపప్పు ప్యూరీని వేసి కలపాలి. గ్రేవీ చిక్కదనాన్ని బట్టి 1 కప్పు నీళ్లు పోసి మూతపెట్టి మీడియం మంటపై 5 నిమిషాలు నూనె పైకి తేలేలా ఉడికించాలి.

గ్రేవీ ఉడికిన తర్వాత ఫ్లేవర్లను బ్యాలెన్స్ చేయడానికి 1 టీస్పూన్ పంచదార వేయాలి. ఇప్పుడు వేయించి ఉంచుకున్న మఖానా, జీడిపప్పులను వేసి కలపాలి. మఖానా గ్రేవీని పీల్చుకున్నాక.. బటర్ క్యూబ్స్, నలిపిన కసూరి మేథీ మరియు 2 టేబుల్ స్పూన్ల ఫ్రెష్ క్రీమ్ వేసి ఒక్క నిమిషం ఉంచి స్టవ్ ఆఫ్ చేయాలి.అంతే, రెస్టారెంట్ స్టైల్ రిచ్ & క్రీమీ 'మఖానా కాజు కర్రీ' సిద్ధం! వేడివేడి చపాతీ, పూల్కా లేదా జీరా రైస్‌తో తింటుంటే వెన్నలా కరిగిపోతూ అమృతతుల్యంగా ఉంటుంది.