India Squad For Hong Kong Sixes: హాంకాంగ్ సిక్సెస్ (Hong Kong Sixes) 2026 టోర్నీ కోసం భారత జట్టును ప్రకటించారు. అక్టోబర్ 30 నుంచి నవంబర్ 1 వరకు జరగనున్న ఈ టోర్నీకి భువనేశ్వర్ కుమార్ (Bhuvneshwar Kumar) కెప్టెన్‌గా వ్యవహరించనున్నాడు. కృనాల్ పాండ్యా, నితీశ్ రాణా, శశాంక్ సింగ్, టీ. నటరాజన్, రాహుల్ త్రిపాఠి, రాహుల్ తెవాటియా జట్టులో ఉన్నారు.
ఈ ఎంపికలో ప్రత్యేకత ఏంటంటే.. భారత జట్టులో ప్రస్తుతం అంతర్జాతీయ క్రికెట్‌లో రెగ్యులర్‌గా కనిపించని పలువురు ఆటగాళ్లకు అవకాశం లభించింది. ఐపీఎల్ 2026 (IPL 2026)లో మంచి ప్రదర్శన చేసిన ఆటగాళ్లను హాంకాంగ్ సిక్సెస్ కోసం ఎంపిక చేసినట్లు జట్టు కూర్పు స్పష్టం చేస్తోంది.
భువనేశ్వర్ కుమార్‌కు ఈ ఏడాది ఐపీఎల్‌లో మంచి సీజన్ దక్కింది. 28 వికెట్లు తీసిన అతడు, ఆ తర్వాత జరిగిన యూపీ టీ20 లీగ్‌లోనూ ఆకట్టుకున్నాడు. కృనాల్ పాండ్యా కూడా ఐపీఎల్‌లో రాణించాడు. అతడిని తిరిగి టీ20 అంతర్జాతీయ జట్టులోకి తీసుకునే అంశంపై కూడా గతంలో వార్తలు వచ్చాయి.
ఎక్కువమంది చదివినది: IND vs WI: వెస్టిండీస్‌తో టీ20 సిరీస్.. ఏకంగా నలుగురిపై వేటుకు సిద్ధమైన గంభీర్..?
నితీశ్ రాణా, శశాంక్ సింగ్ తమ తమ టీ20 లీగ్‌లలో మంచి ప్రదర్శనలు చేస్తున్నారు. నటరాజన్, రాహుల్ త్రిపాఠి, రాహుల్ తెవాటియా చేరికతో జట్టుకు మరింత లోతు వచ్చినట్లు కనిపిస్తోంది. ఈ ఏడాది హాంకాంగ్ సిక్సెస్‌లో వీరంతా అరంగేట్రం చేయనున్నారు.
గత ఎడిషన్‌లో భారత జట్టుకు నిరాశ ఎదురైంది. 2025లో రాబిన్ ఉతప్ప, దినేశ్ కార్తీక్ వంటి పేరున్న ఆటగాళ్లతో బరిలోకి దిగిన భారత్ గ్రూప్ దశలోనే నిష్క్రమించింది. కువైట్ చేతిలో పరాజయం కూడా ఎదురైంది. ఆ టోర్నీలో పాకిస్థాన్ విజేతగా నిలిచింది.
బౌల్ ఫైనల్స్‌లోనూ భారత్ చివరి స్థానంలో నిలిచింది. యూఏఈ, నేపాల్, శ్రీలంక చేతిలో ఓటములు ఎదురయ్యాయి. ఈ నేపథ్యంలో ఈసారి మరింత బలమైన జట్టును ఎంపిక చేశారు. అంతర్జాతీయ స్థాయిలో ప్రస్తుతం పెద్దగా అవకాశాలు దక్కని అనుభవజ్ఞులైన క్రికెటర్లతో కూడిన ఈ బృందం హాంకాంగ్ సిక్సెస్‌లో ఎలా రాణిస్తుందన్నది ఆసక్తికరంగా మారింది.
మరిన్ని క్రీడా వార్తల కోసం ఇక్కడ క్లిక్ చేయండి..