తెలుగు సినీ పరిశ్రమలో ఒకప్పటి విలువలు, మానవ సంబంధాలు, ఆర్థిక లావాదేవీలపై తన వ్యక్తిగత అనుభవాలను పంచుకున్నారు బాబు మోహన్. దివంగత నటీమణులు సిల్క్ స్మిత, సౌందర్యలను తలుచుకుంటూ, సిల్క్ స్మితతో తనకున్న ప్రత్యేక అనుబంధాన్ని వివరించారు. సిల్క్ స్మిత ధైర్యమైన, స్వతంత్ర వ్యక్తిత్వాన్ని కలిగి ఉండేవారని, ఎవరినీ లెక్క చేయని, ఎవరికీ నమస్కారం పెట్టని స్వభావం ఆమెదని పేర్కొన్నారు.
ఎప్పుడూ కాలు మీద కాలు వేసుకుని, కళ్ళద్దాలు పెట్టుకుని కూర్చునే ఆమె, తాను “నిద్రపోతారా లేక అబ్జర్వ్ చేస్తారా?” అని అడిగినప్పుడు, “ఫూల్స్ నన్ను చూస్తారు కాబట్టి కళ్ళద్దాలు తీయను, ఎవరు చూస్తున్నారా అని గమనిస్తుంటాను” అని చెప్పినట్లు బాబు మోహన్ తెలిపారు. హీరోలు వచ్చినా కళ్ళద్దాలు తీయని సిల్క్ స్మిత, తనను చూడగానే కాలు తీసి లేచి నిలబడేదని, తన పట్ల ఆమెకు ఎంతో ప్రేమ ఉండేదని గుర్తుచేసుకున్నారు.
ఒకసారి దుబాయ్ షాపింగ్లో తనకు నచ్చిన కళ్ళద్దాలు కొని, “నాకోసం కాదు, మీకోసం కొన్నాను బాస్, మీకు సూపర్” అని చెప్పిన సంఘటనను పంచుకున్నారు బాబూమోహన్. ఆ కళ్ళద్దాలను తాను చనిపోయేదాకా దాచిపెట్టుకున్నానని ఆయన భావోద్వేగానికి లోనయ్యారు. అయితే, సిల్క్ స్మిత గొప్ప కళాకారిణి అయినప్పటికీ, ఆమె జీవితంలో ఎన్నో కష్టాలు, వివాదాలు ఉండేవని, నిజాయితీగా ఉన్నవారికి వివాదాలు తప్పవని ఆయన అభిప్రాయపడ్డారు.
పాతతరం సినీ పరిశ్రమలో పారితోషిక విధానంపైనా ఆయన స్పందించారు. అప్పట్లో నటులు నా రేటు ఇంత అని ఎప్పుడూ డిమాండ్ చేయలేదని, నిర్మాతలు ఇచ్చింది తీసుకునేవారని అన్నారు. సినిమా మొత్తానికి కాకుండా రోజువారీ కాల్షీట్ల ప్రకారం ఐదు, పది లేదా పదిహేను రోజులకు పారితోషికం ఇచ్చేవారని, ఒక రోజు, రెండు రోజుల పాత్రలకైతే పర్ డే చొప్పున మొదలైందని వివరించారు. మాయలోడు వంటి పెద్ద హిట్ పాట తర్వాత కూడా తాను ప్రత్యేకంగా రెమ్యూనరేషన్ పెంచాలని కోరలేదని, చిరంజీవి గారు స్వయంగా ఫోన్ చేసి పాట హిట్ అని చెప్పినా, తనకు పెద్దగా ఎదో అయిపోయానని భావన రాలేదని తెలిపారు.
ఆ రోజుల్లో విలువలకు, గౌరవానికి అత్యంత ప్రాధాన్యత ఉండేదని బాబూమోహన్ తెలిపారు. నిర్మాతల ముందు, దర్శకుల ముందు వారికి ఇచ్చే గౌరవమే తమకు పారితోషికంగా భావించేవారని అన్నారు. డబ్బుల కోసం వేషాలు వేయడాలు, లక్షలకు లక్షలు పెంచడాలు తమ కాలంలో లేవని స్పష్టం చేశారు. బ్యాలెన్స్ డబ్బులు ఇవ్వలేని నిర్మాతల పట్ల కూడా సానుభూతి చూపేవారని, “ఓకే ఓకే తర్వాత చూద్దాం” అని చెప్పి వెళ్ళిపోయేవారని, ఎప్పుడూ అడిగేవారు కాదని ఆయన గుర్తు చేసుకున్నారు.