ఈ క్లాష్ కేవలం సినిమాల మధ్య మాత్రమే కాదు, ప్రేక్షకుల సహనానికి కూడా ఒక పెద్ద పరీక్ష అనే చెప్పాలి. ఆ ఇద్దరు హీరోలకు దేశవ్యాప్తంగా భారీ ఫాలోయింగ్ ఉంది. ఒకరు మాస్ యాక్షన్ తో ఊపేస్తే, మరొకరు తన స్టైలిష్ లుక్ తో ఆకట్టుకుంటారు. ఈ ఇద్దరి సినిమాలు ఒకే రోజున విడుదలవుతుండటంతో ట్రేడ్ వర్గాల్లో టెన్షన్ మొదలైంది. అయితే ఇక్కడ అసలు సవాల్ కలెక్షన్ల గురించి కాదు.. ఆ సినిమాల నిడివి గురించి. ఒక సినిమా చూడాలంటే దాదాపు నాలుగు గంటల సమయం కేటాయించాల్సి ఉంటుంది. ఇంటి నుండి బయలుదేరిన దగ్గర నుండి సినిమా చూసి తిరిగి వచ్చేసరికి సగం రోజు గడిచిపోవడం ఖాయం. ఆ క్రేజీ పోరులో తలపడుతున్న చిత్రాలు మరేవో కాదు.. దురంధర్ 2 రివెంజ్, టాక్సిక్.
దురంధర్ 2 రివెంజ్
విశ్వసనీయ సమాచారం మేరకు ‘దురంధర్ 2 రివెంజ్’ నిడివి అక్షరాలా **3 గంటల 40 నిమిషాలు** ఉందట. మొదటి భాగం కంటే ఇది ఇంకా ఎక్కువ సమయం ప్రేక్షకులను థియేటర్లలో కూర్చోబెట్టనుంది. ఇంటర్వెల్ సమయం కూడా కలుపుకుంటే సుమారు నాలుగు గంటల పాటు ఒకే చోట ఉండాలి. ఇది మామూలు విషయం కాదు. దర్శకుడు కంటెంట్ విషయంలో ఎక్కడా రాజీ పడకుండా కథను సుదీర్ఘంగా మలిచినట్లు తెలుస్తోంది. గతంలో ‘యానిమల్’, ‘పుష్ప 2’ వంటి సినిమాలు సుదీర్ఘ నిడివి ఉన్నా విజయం సాధించడంతో, దర్శకులు అదే ధైర్యంతో ముందుకు వెళ్తున్నారు.
టాక్సిక్ – మూడున్నర గంటలు
మరోవైపు భారీ అంచనాలతో వస్తున్న ‘టాక్సిక్’ ఫైనల్ కట్ కూడా 3 గంటల 15 నిమిషాల వరకు వచ్చిందని వినికిడి. ఇది కూడా విశ్రాంతితో కలిపి మూడున్నర గంటల సమయాన్ని డిమాండ్ చేస్తుంది. మార్చి 19న ఈ రెండు సినిమాలను మొదటి రోజే చూడాలని ప్లాన్ చేసుకునే సినీ ప్రియులు ఖచ్చితంగా ఆ రోజు ఆఫీసులకు, పనులకు సెలవు ప్రకటించాల్సిందే. ఏపీలో ‘టాక్సిక్’ చిత్రానికి టికెట్ రేట్ల పెంపు కోసం ఇప్పటికే ప్రయత్నాలు మొదలయ్యాయని సమాచారం.
Dhurandhar2 And Toxic
ప్రమోషన్ల హోరు..
రేపటి నుండి మార్చి నెల ప్రారంభం కాబోతుండటంతో, రెండు చిత్రబృందాలు ప్రమోషన్ల వేగాన్ని పెంచనున్నాయి. ‘టాక్సిక్’ టీమ్ ఉత్తరాది మార్కెట్ పై కన్నేయగా, ‘దురంధర్ 2’ టీమ్ దక్షిణాది రాష్ట్రాల్లో స్పెషల్ ఫోకస్ పెట్టనుంది. పేరుకు ఇవి డబ్బింగ్ సినిమాలే అయినా, తెలుగు రాష్ట్రాల్లో వీటికి ఉన్న క్రేజ్ చూస్తుంటే ఒరిజినల్ సినిమాల కంటే ఎక్కువే బజ్ కనిపిస్తోంది. కంటెంట్ బలంగా ఉంటే ప్రేక్షకులు సినిమా ఎంత సేపు ఉన్నా ఆదరిస్తారని గత విజయాలు నిరూపించాయి. మరి మార్చి 19న జరగబోయే ఈ భారీ యుద్ధంలో ఎవరు విజేతగా నిలుస్తారు? అంత సుదీర్ఘ నిడివిని ప్రేక్షకులు ఎలా స్వీకరిస్తారో చూడాలి.