Asian Para Games: జపాన్‌లోని ఐచి-నగోయా వేదికగా జరుగుతున్న ఏషియన్ పారా గేమ్స్ 2026లో భారత క్రీడాకారులు అద్భుత ప్రదర్శన కనబరుస్తున్నారు. పోటీల హోరాహోరీగా సాగుతున్న వేళ భారత్ ఖాతాలో మరో గోల్డ్ మెడల్ చేరింది. మహిళల డిస్కస్ త్రో ఎఫ్54 ఈవెంట్‌లో పోటీపడిన సువర్ణ రాజ్ తన అత్యుత్తమ ప్రతిభతో ప్రథమ స్థానంలో నిలిచింది. మొత్తం ఆరు ప్రయత్నాలలో నాలుగు సార్లు 15 మీటర్ల దూరం దాటించి అదరగొట్టింది. ఐదో ప్రయత్నంలో 15.66 మీటర్ల దూరం విసిరి పసిడి పతకాన్ని తన పేరున రాసుకుంది.
రజతం దక్కించుకున్న ఇరాన్ అథ్లెట్
ఆరుగురు అథ్లెట్లు తలపడిన ఈ ఫైనల్ పోరులో సువర్ణ రాజ్ ఆరంభం నుంచే స్థిరమైన ప్రదర్శన ఇచ్చింది. ఈ పోటీలో ఇరాన్‌కు చెందిన షహ్లా హదిది 15.45 మీటర్ల అత్యుత్తమ ప్రదర్శనతో సిల్వర్ మెడల్ సాధించింది. అలాగే వియత్నాం క్రీడాకారిణి న్యుయెన్ థింగ్ 14.65 మీటర్ల దూరంతో కాంస్య పతకంతో సరిపెట్టుకుంది. సువర్ణ రాజ్ సాధించిన ఈ విజయంతో భారత క్రీడా అభిమానుల్లో పండగ వాతావరణం నెలకొంది. ఈ పతకంతో దేశానికి అందిన మొత్తం గోల్డ్ మెడల్స్ సంఖ్య పదిహేనుకు చేరింది.
బ్యాడ్మింటన్ లో కాంస్యం
ట్రాక్ అండ్ ఫీల్డ్ ఈవెంట్లతో పాటు ఇతర విభాగాల్లోనూ భారత పతకాల జోరు కొనసాగుతోంది. మిక్సెడ్ డబుల్స్ ఎస్ఎల్3-ఎస్‍యూ5 పారా-బ్యాడ్మింటన్ ఈవెంట్‌లో మనీషా రామదాస్, ప్రమోద్ భగత్ జోడీ బ్రాంజ్ మెడల్ కైవసం చేసుకుంది. సెమీఫైనల్ పోరులో ఇండోనేషియాకు చెందిన ఒక్టిలా లీని రాత్రి, హిక్మత్ రమ్దాని జంటతో మన క్రీడాకారులు తలపడ్డారు. తొలి గేమ్ గెలిచినప్పటికీ తర్వాతి రెండు గేముల్లో ప్రత్యర్థి జోరు ముందు నిలవలేకపోయారు. హోరాహోరీగా సాగిన ఈ పోరులో ఓటమిపాలై కాంస్య పతకంతో తృప్తి పడ్డారు.
ఆర్చరీ విభాగంలోనూ రజతం
ఆర్చరీ విభాగంలోనూ భారత్ తన పట్టు నిలుపుకుంది. మహిళల డబ్ల్యూ1 వ్యక్తిగత ఆర్చరీ ఈవెంట్‌లో పోటీపడిన భారత పారా-ఆర్చర్ స్వాతి చౌదరి రజత పతకం సాధించి అరిపించారు. చైనా క్రీడాకారిణి మెంగ్కాన్ సెన్‌తో జరిగిన హోరాహోరీ ఫైనల్లో స్వాతి కేవలం స్వల్ప తేడాతో బంగారు పతకాన్ని కోల్పోయింది. తొలి మూడు ఎండ్ల తర్వాత 4-2 ఆధిక్యంలోకి దూసుకెళ్లినప్పటికీ ఆఖరి దశలో ప్రత్యర్థి పుంజుకోవడంతో రజతం దక్కింది.
ప్రస్తుతం జరుగుతున్న ఈ క్రీడా టోర్నమెంట్‌లో భారత అథ్లెట్ల కఠిన శ్రమ అద్భుత ఫలితాలను ఇస్తోంది. ఇప్పటివరకు ముగిసిన పోటీల ఆధారంగా భారత్ మొత్తం 65 పతకాలను తన ఖాతాలో వేసుకుంది. ఇందులో 15 స్వర్ణాలు, 22 రజతాలు, 28 కాంస్య పతకాలు ఉన్నాయి. రాబోయే రోజుల్లో ఇతర ఈవెంట్లలోనూ మరిన్ని పతకాలు వచ్చే అవకాశం ఉందని క్రీడా విశ్లేషకులు భావిస్తున్నారు. దివ్యాంగ క్రీడాకారులు చూపుతున్న పట్టుదల దేశ యువతకు ఎంతో స్ఫూర్తినిస్తోంది.
మరిన్ని క్రీడా వార్తల కోసం ఇక్కడ క్లిక్ చేయండి..