దుబాయ్ నుంచి టెల్ అవీవ్ వెళ్తున్న ఫ్లైదుబాయ్ విమానంలో సెప్టెంబర్ 30న ఈ ఘటన జరిగింది. విమానం గాల్లో ఉండగానే కో-పైలట్ హమ్మామ్ అల్-హమ్మామీ కెప్టెన్ స్మిత్ మచ్చర్‌పై పికాక్స్ గొడ్డలితో వెనుక నుంచి నాలుగైదు సార్లు కొట్టాడు. దాడిలొ మచ్చర్‌కు జరిగింది సాధారణ ఫ్రాక్చర్ కాదు. పుర్రె ఎముకలో కొంత భాగం లోపలికి ఒత్తుకుపోయింది. ఆ పరిస్థితిని ‘డిప్రెస్డ్ స్కల్ ఫ్రాక్చర్’ అంటారని వైద్యులు తెలిపారు. మెదడుపై ఒత్తిడి పెంచే ప్రమాదం ఉండటంతో తబుక్‌లో విమానం ల్యాండ్ అయిన తర్వాత మచ్చర్‌కు వెంటనే శస్త్రచికిత్స చేసారు.
ప్రాణాల కోసం పోరాడుతూనే ప్రయాణికుల గురించి ఆలోచన
ఈ ఘటనపై ప్రధాని నరేంద్ర మోదీతో జరిగిన వీడియో కాల్‌లో మచ్చర్ స్వయంగా వివరాలు వెల్లడించారు. తీవ్రంగా గాయపడిన తర్వాత కాక్‌పిట్ నేలపై పడిపోయారు. విమానం వేగంగా కిందకు దిగుతుండటం గుర్తించి, కాక్‌పిట్ తలుపు తెరవకపోతే ప్రయాణికుల ప్రాణాలకు ప్రమాదమని భావించి తన శక్తినంతా కూడదీసుకుని చివరకు తలుపు తెరిచాననీ చెప్పారు. తర్వాత ప్రయాణికులు కాక్‌పిట్‌లోకి ప్రవేశించి దాడి చేసిన కోపైలట్‌ను అదుపులోకి తీసుకున్నారు.
తీవ్ర గాయాల మధ్య విమాన ప్రమాదాన్ని తప్పించిన హీరో
విమానంలో 170 మందికి పైగా ప్రయాణికులు, సిబ్బంది ఉన్న సమయంలో ఈ ఘటన చోటుచేసుకుంది. విమానం ఒక్కసారిగా వేల అడుగుల ఎత్తు కోల్పోయినప్పటికీ, మచ్చర్ తీసుకున్న కీలక నిర్ణయం పరిస్థితి అదుపులోకి తీసుకురావడానికి సహాయపడింది. అనంతరం ఇద్దరు స్టాండ్ బై పైలట్లు విమానాన్ని ల్యాండ్ చేసారు. ఈ ఘటన తర్వాత మచ్చర్ ధైర్యాన్ని ప్రధాని మోదీతో పాటు ఇజ్రాయెల్ ప్రధాని బెంజమిన్ నెతన్యాహు ప్రశంసించారు. దేశం గర్వించదగ్గ హీరోగా మోదీ అభివర్ణించారు. సౌదీలో అత్యవసర శస్త్రచికిత్స అనంతరం మచ్చర్‌ను యూఏఈకి తరలించారు. ప్రస్తుతం అబుదాబిలో వైద్యుల నిరంతర పర్యవేక్షణలో ఆయనకు చికిత్స కొనసాగుతోంది.