చపాతి, రోటి.. బరువు తగ్గేందుకు వీటిని చాలా మంది బెస్ట్ ఆప్షన్ అనుకుంటారు. ఎక్కువగా రాత్రి డిన్నర్లోకి చపాతీలను ఇష్టంగా చేసుకుని తింటారు. కానీ, చాలామంది ఇళ్లలో ఎదురయ్యే ప్రధాన సమస్య ఏమిటంటే, చపాతీలు చేసిన అరగంటకే గట్టిగా లేదా రబ్బరులా మారిపోవడం. ఎంత ప్రయత్నించినా హోటల్ లేదా రెస్టారెంట్లలో దొరికే విధంగా సాఫ్ట్గా రావడం లేదని బాధపడేవారి కోసం కొన్ని అద్భుతమైన వంట చిట్కాలు ఇక్కడ ఉన్నాయి.
గోరువెచ్చని నీరు లేదా పాలు: పిండి కలిపేటప్పుడు సాధారణ నీటి కంటే గోరువెచ్చని నీటిని వాడటం ఉత్తమం. ఇంకా మెత్తగా రావాలంటే నీటికి బదులు పాలను ఉపయోగించవచ్చు. పాలు పిండిలోని తేమను కాపాడి, చపాతీలు ఎక్కువ సేపు మెత్తగా ఉండేలా చేస్తాయి.
నూనె లేదా నెయ్యి: పిండి కలిపేటప్పుడు అందులో ఒక టీస్పూన్ నూనె లేదా నెయ్యి వేయండి. ఇది పిండిని మృదువుగా మార్చడమే కాకుండా, చపాతీలు కాల్చేటప్పుడు అవి త్వరగా ఎండిపోకుండా చూస్తుంది.
పిండిని నానబెట్టడం (Resting Time): పిండి కలిపిన వెంటనే చపాతీలు చేయకూడదు. పిండిని కలిపిన తర్వాత దానిపై తడి గుడ్డ లేదా మూత పెట్టి కనీసం 20 నుండి 30 నిమిషాల పాటు పక్కన పెట్టాలి. దీనివల్ల పిండిలోని గ్లూటెన్ యాక్టివేట్ అయ్యి, చపాతీలు సాగే గుణాన్ని పొందుతాయి.
ఒత్తే విధానం: చపాతీలను మరీ పల్చగా లేదా మరీ మందంగా కాకుండా సమానంగా ఒత్తాలి. అంచుల వద్ద పల్చగా ఉండేలా చూసుకోవాలి. పిండిని మరీ ఎక్కువగా వాడితే చపాతీలు పొడిగా మారి గట్టిపడతాయి.
కాల్చే పద్ధతి: పెనం బాగా వేడెక్కిన తర్వాతే చపాతీని వేయాలి. తక్కువ మంటపై ఎక్కువ సేపు కాల్చితే చపాతీ గట్టిగా మారుతుంది. కాబట్టి మధ్యస్థం నుండి హై ఫ్లేమ్ మీద వేగంగా అటు ఇటు తిప్పుతూ కాల్చాలి. ఈ చిన్న చిన్న జాగ్రత్తలు పాటిస్తే మీ ఇంట్లో కూడా ప్రతిరోజూ దూదిలాంటి మెత్తని చపాతీలను ఎంజాయ్ చేయవచ్చు!
మరిన్ని లైఫ్ స్టైల్ న్యూస్ కోసం క్లిక్ చేయండి..