బ్యాంకులు మీ ఆదాయానికి మించి ఎక్కువ క్రెడిట్ లిమిట్ ఇస్తుంటాయి. అయితే, కార్డు లిమిట్ ఎంత ఉన్నా, మీరు ఖర్చు చేసే సామర్థ్యం మీ ఆదాయంపైనే ఆధారపడి ఉండాలి. నిపుణుల సూచన ప్రకారం, మీ మొత్తం క్రెడిట్ లిమిట్లో 30 నుంచి 40 శాతానికి మించి ఎప్పుడూ వాడకూడదు. ఈ ప్రాథమిక నియమాన్ని విస్మరించి, విలాసాల కోసం లిమిట్ మొత్తం ఖర్చు చేసినప్పుడు సమస్యలు మొదలవుతాయి.
బిల్లు రాగానే చాలామంది చేసే పెద్ద తప్పు ‘కనీస చెల్లింపు’ మాత్రమే కట్టడం. ఇది లేట్ ఫీజు నుండి రక్షించవచ్చు కానీ, మిగిలిన బకాయిపై పడే 36% నుండి 52% వరకు ఉండే చక్రవడ్డీ భారాన్ని ఆపలేదు. ఉదాహరణకు, రూ. లక్ష బకాయి ఉంటే, ఒక్క నెలలోనే సుమారు రూ. 4,500 వరకు వడ్డీ రూపంలోనే పోతుంది. ఇలా కనీస చెల్లింపులతో నెట్టుకొస్తే, అప్పు కొండలా పేరుకుపోవడం ఖాయం.
ఈ ఊబి నుండి బయటపడే మార్గాలు..
- ఈఎంఐ (EMI)గా మార్చుకోవడం- బకాయిలు ఒకేసారి కట్టలేనప్పుడు, వాటిని ఈఎంఐలుగా మార్చుకుంటే వడ్డీ భారం 48% నుండి 12-18%కి తగ్గుతుంది.
- పర్సనల్ లోన్ (Debt Consolidation)- క్రెడిట్ కార్డు భారీ వడ్డీ కంటే, పర్సనల్ లోన్ వడ్డీ రేటు చాలా తక్కువ. పర్సనల్ లోన్ ద్వారా కార్డు అప్పును పూర్తిగా క్లియర్ చేయడం ఉత్తమం.
- గోల్డ్ లోన్స్- మరీ అత్యవసరమైతే, బంగారు రుణాల ద్వారా తక్కువ వడ్డీతో (8-10%) డబ్బు తీసుకుని క్రెడిట్ కార్డు బిల్లు కట్టడం మేలు.
- వన్-టైమ్ సెటిల్మెంట్- పరిస్థితి చేయి దాటినప్పుడు బ్యాంకును సంప్రదించి, వడ్డీ, పెనాల్టీలపై రాయితీ కోరుతూ సెటిల్మెంట్ చేసుకోవచ్చు. అయితే, బ్యాంకు నుంచి లిఖితపూర్వక ధృవీకరణ పొందిన తర్వాతే ముందడుగు వేయాలి.
క్రెడిట్ కార్డు అనేది అప్పు అని మర్చిపోవద్దు. నెలవారీ స్టేట్మెంట్లను గమనిస్తూ, లిమిట్ లోపల ఖర్చు చేస్తూ, పూర్తి బిల్లును సకాలంలో చెల్లించడం ద్వారా మాత్రమే ఆర్థిక క్రమశిక్షణతో సురక్షితంగా ఉండగలరు. కార్డును ఒక బాధ్యతగా వాడినప్పుడే అది మీకు వరంగా మారుతుంది, లేదంటే అది మిమ్మల్ని ఆర్థిక సంక్షోభంలోకి నెట్టే సాధనంగా మారుతుంది!