రక్తహీనతకు ప్రధాన కారణం శరీరంలో ఐరన్ లోపం కావడం. ఎండు ఖర్జూరంలో ఐరన్ పుష్కలంగా ఉండటం వల్ల, ఇది శరీరంలో హీమోగ్లోబిన్ శాతాన్ని పెంచడానికి బాగా తోడ్పడుతుంది. ఇందులోని రాగి, ఇతర ఖనిజాలు ఎర్ర రక్త కణాల ఉత్పత్తిని వేగవంతం చేస్తాయి. అలాగే, రోజంతా బద్ధకంగా ఉండేవారికి ఎండు ఖర్జూరం ఒక వరప్రసాదం. ఇందులో ఉండే గ్లూకోజ్, సుక్రోజ్, ఫ్రక్టోజ్ వంటి సహజ చక్కెరలు శరీరంలోకి చేరిన వెంటనే అలసటను దూరం చేసి ఇన్స్టంట్ ఎనర్జీని ఇస్తాయి. పొటాషియం, మెగ్నీషియం కండరాల నొప్పులను తగ్గించి, శరీరాన్ని రోజంతా చురుగ్గా ఉంచుతాయి.
ఆరోగ్య ప్రయోజనాలు
ఎండు ఖర్జూరం కేవలం నీరసాన్నే కాదు, జీర్ణక్రియను కూడా మెరుగుపరుస్తుంది. ఇందులోని పీచు పదార్థం మలబద్ధకం సమస్యను సమర్థవంతంగా తగ్గిస్తుంది. కాల్షియం, ఫాస్పరస్ ఎముకలను, పళ్లను గట్టిపరుస్తాయి. పొటాషియం రక్తపోటును అదుపులో ఉంచి గుండె ఆరోగ్యాన్ని కాపాడుతుంది.
తీసుకోవాల్సిన విధానం
రాత్రిపూట మూడు లేదా నాలుగు ఎండు ఖర్జూరాలను శుభ్రం చేసి, గింజలు తీసేసి ముక్కలుగా చేసుకోవాలి. వీటిని ఒక గ్లాసు పాలలో వేసి బాగా మరిగించి, రాత్రి పడుకునే ముందు తాగాలి. అలాగే, రాత్రి నానబెట్టిన ఖర్జూరాలను మరుసటి రోజు ఉదయం నీటితో సహా తీసుకోవడం కూడా మంచి ఫలితాన్ని ఇస్తుంది. ఎండు ఖర్జూరాలను పొడిలా చేసి పాలలో కలిపి పిల్లలకు కూడా ఇవ్వవచ్చు.
ఇలా నెల రోజుల పాటు క్రమం తప్పకుండా పాటిస్తే శరీరంలో మార్పు స్పష్టంగా కనిపిస్తుంది. అయితే ఎండు ఖర్జూరాల్లో క్యాలరీలు, చక్కెరలు ఎక్కువగా ఉంటాయి కాబట్టి రోజుకు మూడు నుంచి ఐదు కంటే ఎక్కువ తినకూడదు. ఒకవేళ షుగర్ వ్యాధి ఉన్నవారు మాత్రం వీటిని తీసుకునే ముందు వైద్యుల సలహా తీసుకోవడం తప్పనిసరి. సహజ సిద్ధమైన ఈ చిట్కాలను పాటించడం ద్వారా సంపూర్ణ ఆరోగ్యాన్ని, ఉత్సాహాన్ని సొంతం చేసుకోవచ్చు.