ఇంద్రకీలాద్రిపై ఉన్న శ్రీ దుర్గామల్లేశ్వరస్వామి ఆలయానికి ప్రతి ఏడాది కోట్ల సంఖ్యలో భక్తులు తరలివస్తున్నారు. సమీప ప్రాంతాల నుంచే కాకుండా ఇతర రాష్ట్రాల నుంచి కూడా భక్తులు పెద్దఎత్తున వస్తుంటారు. అయితే ఇంత భారీగా భక్తుల రాకపోకలు ఉన్నప్పటికీ, వారికి తగిన వసతి సౌకర్యాలు మాత్రం అందుబాటులో లేవు. ముఖ్యంగా కాటేజీల కొరత భక్తులకు తీవ్ర అసౌకర్యాన్ని కలిగిస్తోంది.భక్తులు సాధారణంగా ఒకరోజైనా ఇంద్రకీలాద్రిపై ఉండి ప్రశాంతంగా దర్శనం చేసుకోవాలని కోరుకుంటారు. కానీ సరైన గదులు లేకపోవడంతో.. వచ్చి వెంటనే దర్శనం చేసుకుని తిరిగి వెళ్లిపోవాల్సిన పరిస్థితి ఏర్పడుతోంది. కుటుంబాలతో వచ్చే వారికి ఇది మరింత ఇబ్బందిగా మారుతోంది.
గత 10-15 సంవత్సరాలుగా కాటేజీల నిర్మాణంపై అనేక ప్రతిపాదనలు వచ్చినప్పటికీ, అవి కాగితాలకే పరిమితమవుతున్నాయి. అధికారులు మారినప్పుడల్లా కొత్త ప్రణాళికలు రూపొందుతున్నా, వాటి అమలు మాత్రం జరగడం లేదు. దీంతో సమస్య అలాగే కొనసాగుతోంది. రైల్వే స్టేషన్ సమీపంలో కాటేజీలు, కల్యాణ మండపాలు నిర్మించాలని ఒక ట్రస్ట్ ప్రతిపాదించినా, అది కూడా అమలుకాలేదు. ఈ స్థలం రవాణా సౌకర్యాలకు దగ్గరగా ఉండటంతో భక్తులకు ఎంతో అనుకూలంగా ఉండేదని భావించారు. ప్రస్తుతం మాత్రం తాత్కాలికంగా డార్మెటరీలు ఏర్పాటు చేసి అవసరాన్ని తీరుస్తున్నారు.
ఇక కుమ్మరిపాలెం ప్రాంతంలో కూడా కాటేజీలు నిర్మించేందుకు ప్రణాళికలు సిద్ధం చేశారు. స్థలాన్ని సర్దుబాటు చేయడానికే ఖర్చు పెట్టినా, ప్రాజెక్ట్ మధ్యలోనే నిలిచిపోయింది. అలాగే భారీ స్థాయిలో కాటేజీలు, గెస్ట్ హౌసులు, పార్కింగ్, ఇతర సౌకర్యాలతో కూడిన ప్రాజెక్ట్ కూడా ప్రతిపాదించారు. కానీ ప్రభుత్వం మారడంతో ఆ ప్రణాళిక కూడా ముందుకు సాగలేదు. కాబట్టి ఇప్పటికైనా భక్తుల అవసరాలను దృష్టిలో ఉంచుకుని కాటేజీల నిర్మాణంపై అధికారులు దృష్టి పెట్టాల్సిన అవసరం ఉందని స్థానికులు కోరుతున్నారు. సరైన ప్రణాళికతో వసతి సదుపాయాలు పెంచితే భక్తులకు సౌకర్యం కలగడమే కాకుండా ఆలయానికి అదనపు ఆదాయం కూడా లభించే అవకాశం ఉందంటున్నారు.
మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి.