భారతీయ రైల్వేలు ప్రపంచంలోనే నాల్గవ అతిపెద్ద రైలు నెట్వర్క్గా గుర్తింపు పొందాయి. లక్షలాది మంది ప్రయాణికులను ప్రతి రోజు గమ్యస్థానాలకు చేర్చేందుకు రైల్వే ఉద్యోగులు నిత్యం విధుల్లో ఉంటారు. రోజుకు సుమారు 25,000 రైళ్లను సురక్షితంగా నడపడం ద్వారా అధిక స్థాయి కార్యాచరణ విశ్వసనీయతను రైల్వేలు కొనసాగిస్తున్నాయి. అయితే రైల్వే ట్రాక్ల నిర్వహణ పనులు, పొగమంచు పరిస్థితులు, చెడు వాతావరణం, మార్గ అడ్డంకులు, గొలుసు లాగడం, నిరసనలు, ట్రాక్లపై పశువులు చిక్కుకోవడం వంటి కారణాలు రైళ్ల సమయపాలనను ప్రభావితం చేస్తాయి.
ప్రయాణికుల రైళ్లు, సరుకు రైళ్లు సకాలంలో నడిచేలా భారతీయ రైల్వేలు పలు చర్యలు చేపడుతున్నాయి. రైల్వే ఉద్యోగులు డివిజనల్, జోనల్, రైల్వే బోర్డు స్థాయిలో ప్యాసింజర్ రైళ్ల నడకను కఠినంగా పర్యవేక్షిస్తున్నారు. ఆస్తుల విశ్వసనీయతను పెంచడానికి వాటి నిర్వహణ కోసం రోలింగ్ బ్లాక్ సిస్టమ్ను ప్రవేశపెట్టడం, ప్రణాళికాబద్ధంగా మౌలిక సదుపాయాల అడ్డంకులను తొలగించడం, శాస్త్రీయ పద్ధతిలో టైమ్ టేబుల్ను హేతుబద్ధీకరించడం వంటి చర్యలు అమలు చేస్తున్నారు. ప్యాసింజర్ రైళ్ల రాకపోకలను నిజ సమయంలో గుర్తించడానికి డేటా లాగర్లను ఉపయోగిస్తున్నారు. సాంకేతికత, మెరుగైన మౌలిక సదుపాయాల్లో పెట్టుబడులు పెట్టడం ద్వారా రైల్వే ఆస్తుల విశ్వసనీయతను పెంచుతున్నారు.
మౌలిక సదుపాయాల అభివృద్ధి వల్ల లోకోస్, ఓవర్ హెడ్ ఎక్విప్మెంట్ (ఓహెచ్ఈ) వంటి వ్యవస్థల్లో వైఫల్యాల శాతం దాదాపు 2 శాతానికి పరిమితమైంది. రైల్వే మార్గదర్శకాల ప్రకారం ట్రాక్, రోలింగ్ స్టాక్, ఓహెచ్ఈ, సిగ్నలింగ్ వంటి అన్ని ఆస్తులను సకాలంలో తనిఖీ చేసి నిర్వహణ చేపడతారు. జోనల్ రైల్వేలలో ప్రత్యేక అధికారులను నియమించి పనులను పర్యవేక్షిస్తున్నారు. నివారణ నిర్వహణ చర్యల ద్వారా రైళ్ల భద్రతను కూడా నిర్ధారిస్తున్నారు. రైల్వేలు ప్రత్యేక సమయపాలన డ్రైవ్లను నిర్వహించి సిబ్బందికి అవగాహన కల్పిస్తున్నాయి. డీజిల్ లోకోమోటివ్లు, ఓహెచ్ఈ వైఫల్యాలు, సిగ్నల్ సమస్యలు, ట్రాక్ లోపాలు, రద్దీ, రోలింగ్ స్టాక్ సమస్యల వల్ల జరిగే ప్రతి రైలు ఆలస్యాన్ని అధికారులు విశ్లేషించి దిద్దుబాటు చర్యలు తీసుకుంటారు.
రైళ్ల సజావుగా నడవడానికి ట్రాక్ స్థిరత్వం, డ్రైనేజీ మెరుగుపరచేందుకు బ్యాలస్ట్ లోతైన స్క్రీనింగ్ నిర్వహిస్తారు. అధిక సామర్థ్యంతో పనిచేసే బ్యాలస్ట్ క్లీనింగ్ మెషీన్లు (బీసీఎంలు) ఉపయోగించి ఈ పనిని చేస్తారు. హై అవుట్పుట్ బ్యాలస్ట్ క్లీనింగ్ మెషీన్లు (హెచ్ఓబీసీఎంలు) ఉపయోగించడం ద్వారా తక్కువ మాన్యువల్ జోక్యంతో ట్రాక్ బ్యాలస్ట్ బెడ్ను సమర్థవంతంగా, సమానంగా శుభ్రపరచడం సాధ్యమవుతుందని రైల్వే అధికారులు తెలిపారు.
మరిన్ని బిజినెస్ వార్తల కోసం ఇక్కడ క్లిక్ చేయండి